2018 йил 14 ноябр куни Тиббий профилактика факультетининг 203 ва 204 гуруҳлари Зангиота мажмуасини зиёрат қилиш учун боришди.
Факультетнинг Ёшлар билан ишлаш бўйича декан ўринбосари А.А.Раззоқов талабаларга мажмуанинг тарихи ҳақида қуйидача сўзлаб берди: – Тошкент вилоятидаги XV асрга оид меъморий ёдгорлик ҳисобланган Зангиота зиёратгоҳи нафақат республикамизда, балки Ўрта Осиё мамлакатлари халқлари орасида маълум ва машҳурдир. Мажмуанинг бундай номланиши Ойхўжа ибн Тошхўжа исмли шахс номи билан боғлиқ бўлиб, тўқ буғдойранг тусли киши бўлганлиги сабабли одамлар орасида “Занги ота” (яъни “қорачадан келган”) номи билан машҳур бўлган. Шайх Арслонбобнинг авлоди (эвараси) бўлган, ўз даврида яссавия тариқати пири муршиди даражасига кўтарилган бу зот Тошкент шаҳрининг Самарқанд дарвоза маҳалласида туғилиб ўсганлиги ҳақида тахминлар бор. Милодий 1258 йил, Тошкент яқинидаги ҳозирги Зангиота қишлоғида вафот этган. Зангиота ва унинг издошлари халқ орасида ватанпарварлик, меҳнатсеварлик, адлу инсоф, поклик, яхшилик, меҳр-шафқат, художўйлик каби умуминсоний ғояларни тарғиб қилган. Зангиота чўпонлик қилиб, ҳалол ризқ топиб ҳаёт кечирган. Зангиотанинг каромат ва фазилатларини Хўжа Аҳрор, шоирлар Махтумқули, Камий Тошкандий ва бошқалар тилга олиб, шеър ва хотиралар ёзиб қолдирганлар, халқ орасида у киши ҳақида ривоятлар тўқилган. Зангиота мақбарасини XIV асрнинг 80-йилларида Амир Темур қурдиргани ва XV асрнинг 20-йилларида Мирзо Улуғбек ҳомийлигида қўшимча қурилишлар ҳамда безак ишлари бажарилгани, мажмуа мустабид тузум даврида эса омборхона, кейинчалик музей вазифасини ўтаган. Мустақилликдан кейин бу ерда қурилиш – таъмирлаш ишлари олиб борилди ва мана шундай гўзал манзара кўринишга келтирилди. Талабалар ўзлари қизиқтирган саволларни беришди. Юртимиз бўйлаб бундай тарихий обидаларни зиёрат қилиш ва улардан ибрат олиш ҳар бир инсоннинг бурчи эканлиги тўғрисида талабалар томонидан фикрлар билдириб ўтилди.
